കോഴിക്കോട് : വര്‍ക്ക് ഷോപ്പിൽ നിന്നും 20 ലിറ്റർ ചാരായം പിടികൂടി. കൂടരഞ്ഞി കാരാട്ട് വടക്കാഞ്ചേരി വീട്ടിൽ വി.വി. ജിജോ (43) വിനെയാണ് ഇയാളുടെ വർക്ക് ഷോപ്പിൽ നിന്നും 20 ലിറ്റർ ചാരായവുമായി കോഴിക്കോട് എക്സൈസ് എൻഫോഴ്സ്മെന്റ് ആന്റ് ആന്റി നർക്കോട്ടിക് സ്പെഷ്യൽ സ്ക്വാഡ് കസ്റ്റഡിയിലെടുത്തത്.
തൊണ്ടിയും പ്രതിയേയും കോടതിയിൽ ഹാജരാക്കി. കഴിഞ്ഞ മാസം 13 ന് ഇയാളുടെ വീട്ടിൽ നിന്ന് 1200 ലിറ്റർ വാഷും 20 ലിറ്റർ ചാരായവും പിടികൂടിയിരുന്നെങ്കിലും ഇയാൾ ഓടി രക്ഷപ്പെടുകയായിരുന്നു. വാടക വീടുകൾ കേന്ദ്രീകരിച്ചും ഇയാൾ വാറ്റു നടത്താറുണ്ട്. പ്രിവന്റീവ് ഓഫീസർ പി.കെ അനിൽ കുമാറിന്റെ നേതൃത്വത്തിൽ സിവിൽ എക്സൈസ് ഓഫീസർ വി.എ ജസ്റ്റിൻ, ഗ്രേഡ് പ്രിവന്റീവ് ഓഫീസർ സി. വിജയൻ, ഡ്രൈവർ എൻ.പി. പ്രബീഷ് എന്നിവരും സംഘത്തിലുണ്ടായിരുന്നു.
