കൊയിലാണ്ടി: കൊയിലാണ്ടി എം.എൽ.എ. (MLA) കെ. പ്രവീൺ കുമാറിന്റെ വിദ്യാഭ്യാസ സമഗ്ര പദ്ധതിയുടെ ഭാഗമായി മണ്ഡലത്തിലെ ഒന്നാം ക്ലാസ് വിദ്യാർത്ഥികൾക്കായി ഒരുക്കിയ ‘സമ്മാനച്ചെപ്പ്’ പഠന സാമഗ്രികളുടെ കിറ്റ് വിതരണത്തിന് തുടക്കമായി. പദ്ധതിയുടെ കൊയിലാണ്ടി നഗരസഭാ തല ഉദ്ഘാടനം കോതമംഗലം ജി.എൽ.പി. (G.L.P) സ്കൂളിലെ പുതിയ വിദ്യാർത്ഥികൾക്ക് കിറ്റുകൾ നൽകിക്കൊണ്ട് കെ. പ്രവീൺ കുമാർ എം.എൽ.എ. നിർവ്വഹിച്ചു. കോതമംഗലം സ്കൂളിൽ നടന്ന ചടങ്ങിൽ നഗരസഭാ പൊതുമരാമത്ത് സ്റ്റാൻഡിങ് കമ്മിറ്റി ചെയർപേഴ്സൺ ദൃശ്യ അധ്യക്ഷത വഹിച്ചു. നഗരസഭാ വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ കെ.എം. നജീബ്, കൗൺസിലർ കെ.കെ. ദാമോദരൻ എന്നിവർ പങ്കെടുത്തു സംസാരിച്ചു.
യു.ഡി.എഫ്. (UDF) മുൻസിപ്പൽ കമ്മിറ്റി കൺവീനർ കെ.പി. വിനോദ് കുമാർ, രാജേഷ് കീഴരിയൂർ, എ. അസീസ്, ചെറുവക്കാട്ട് രാമൻ, എം.എം. ശ്രീധരൻ എന്നിവരും പ്രധാന അധ്യാപകൻ പ്രമോദ് മാസ്റ്ററും ചടങ്ങിൽ സംബന്ധിച്ചു. സ്കൂളിലെ ഒന്നാം ക്ലാസ് വിദ്യാർത്ഥികളും അവരുടെ രക്ഷിതാക്കളും അധ്യാപകരും ചടങ്ങിന്റെ ഭാഗമായി.