സി.വി. ബാലകൃഷ്ണൻ്റെ പ്രശസ്തമായ ‘കാമമോഹിതം’ എന്ന നോവൽ രാജ്യാന്തര നാടകവേദികൾ ലക്ഷ്യമാക്കി രംഗരൂപം പ്രാപിക്കുന്നു. കൊയിലാണ്ടി ആസ്ഥാനമായി പ്രവർത്തിക്കുന്ന സതേൺ തിയേറ്റർ ഇന്ത്യ ഡ്രമാറ്റിക് ആർട്സ് എന്ന നാടകസംഘത്തിൻ്റെ ആദ്യ സംരംഭമായാണ് ഈ നാടകം ഒരുങ്ങുന്നത്. ഇതിൻ്റെ ഭാഗമായുള്ള അഭിനേതാക്കളുടെ തെരഞ്ഞെടുപ്പ് (കാസ്റ്റിങ്) കഴിഞ്ഞ ദിവസം കൊയിലാണ്ടി ടൗൺഹാളിൽ വെച്ച് നടന്നു. അന്താരാഷ്ട്ര നാടകോത്സവങ്ങളിൽ അവതരിപ്പിക്കത്തക്ക വിധം അതീവ ഗൗരവത്തോടെയുള്ള ഒരു കലാസൃഷ്ടിക്കാണ് ഇതിലൂടെ സംഘാടകർ ലക്ഷ്യമിടുന്നത്.
ദേശീയ പുരസ്കാര ജേതാവായ പ്രമുഖ ചലച്ചിത്ര സംവിധായകൻ സുവീരനാണ് ഈ നാടകത്തിന് രംഗഭാഷയൊരുക്കുന്നത്. സതേൺ തിയേറ്റർ ഇന്ത്യയുടെ ബാനറിൽ ഏകദേശം എൺപതോളം പേരടങ്ങുന്ന ഒരു ജനകീയ കൂട്ടായ്മയാണ് നാടകത്തിൻ്റെ നിർമാണ ചുമതല ഏറ്റെടുത്തിരിക്കുന്നത്. ഒരു നോവലിനെ നാടകീയത ഒട്ടും ചോർന്നുപോകാതെ പുതിയൊരു ദൃശ്യാനുഭവമാക്കി മാറ്റാനാണ് സുവീരനും സംഘവും ശ്രമിക്കുന്നത്.
നാടക നിർമാണത്തിൻ്റെ പങ്കാളിത്ത ബോണ്ട് വിതരണത്തിൻ്റെ ഉദ്ഘാടനം ചലച്ചിത്ര നടൻ സുധി കാതൽ നിർവഹിച്ചു. ആദ്യ ബോണ്ട് ഒലീവിയ കുഞ്ഞമ്മദ് ഏറ്റുവാങ്ങി. സതേൺ തിയേറ്റർ ഇന്ത്യ ചെയർമാൻ ആർ. പ്രകാശ് രാരോത്ത് അധ്യക്ഷത വഹിച്ച ചടങ്ങിൽ കൊയിലാണ്ടി നഗരസഭാ അധ്യക്ഷൻ യു.കെ. ചന്ദ്രൻ, കൺവീനർ മധു മങ്കുട്ടിൽ തുടങ്ങിയവർ സംസാരിച്ചു. വലിയൊരു ജനകീയ പങ്കാളിത്തത്തോടെ ഒരുങ്ങുന്ന ഈ നാടകം മലയാള നാടകവേദിയിലെ ശ്രദ്ധേയമായ ഇടപെടലായി മാറുമെന്നാണ് പ്രതീക്ഷിക്കപ്പെടുന്നത്.
