പയ്യോളി: തിക്കോടി മീത്തലെപ്പള്ളിക്കും തൃക്കോട്ടൂർ ഗണപതി ക്ഷേത്രത്തിനും ഇടയിലായി ഫൂട്ട് ഓവർബ്രിഡ്ജ് (Foot Overbridge) നിർമ്മിക്കുമെന്ന് ഡോ. പി.ടി. ഉഷ എം.പി. ഉറപ്പുനൽകി. സ്നേഹതീരം റസിഡൻസ് അസോസിയേഷൻ ഭാരവാഹികൾ കഴിഞ്ഞ വർഷം നൽകിയ നിവേദനം പരിഗണിച്ചാണ് എം.പി.യുടെ ഈ സുപ്രധാന പ്രഖ്യാപനം.
ഇതിനുപുറമെ, ദേശീയപാത വികസനവുമായി ബന്ധപ്പെട്ട് പ്രദേശത്തെ യാത്രാക്ലേശം പരിഹരിക്കാൻ മറ്റൊരു നിവേദനം കൂടി അസോസിയേഷൻ ഭാരവാഹികൾ എം.പി.ക്ക് സമർപ്പിച്ചു. മീത്തലെപ്പള്ളി – പള്ളിത്താഴ അങ്കണവാടി റോഡിൽ ഏറ്റവും ഉയരം കൂടിയ പോസ്റ്റ് നമ്പർ 699-ന് സമീപം അടിപ്പാത (Underpass) നിർമ്മിക്കണമെന്നാണ് നിവേദനത്തിലൂടെ ആവശ്യപ്പെട്ടിട്ടുള്ളത്.
സ്നേഹതീരം റസിഡന്റ്സ് അസോസിയേഷൻ പ്രസിഡന്റ് ടി. ഖാലിദ്, സെക്രട്ടറി സി. ബാലൻ, ജോയിന്റ് സെക്രട്ടറി സി.എം. സുജാത, ട്രഷറർ സി.കെ. ബാലകൃഷ്ണൻ എന്നിവരുടെ നേതൃത്വത്തിലാണ് നിവേദക സംഘം എം.പി.യെ കണ്ട് നിവേദനം കൈമാറിയത്.
