കൊച്ചി: മലയാളികൾ ഹൃദയത്തിലേറ്റിയ പഴയകാല ഹിറ്റ്‌ ഗാനത്തിന്റെ പശ്ചാത്തലത്തിൽ പൊലീസ്‌ ഇറക്കിയ മഴക്കാല അപകട മുന്നറിയിപ്പിന്‌ നിറഞ്ഞ കൈയടി. ‘വിവാഹിത’ സിനിമയിലെ ‘ദേവലോക രഥവുമായി തെന്നലേ, തെന്നലേ’ എന്ന ഗാനവും മഴസമയത്തെ അപകടദൃശ്യങ്ങളും കോർത്തിണക്കിയാണ്‌ പൊലീസ്‌ ഫെയ്‌സ്‌ബുക്കിൽ വീഡിയോയിട്ടത്‌. മികച്ച ഗാനവും ദൃശ്യങ്ങളും ചേർന്നതോടെ സംഗതി ഹിറ്റ്‌.
‘ദേവലോക രഥവുമായി’ എന്ന ഭാഗം പൊലീസ്‌ ഒഴിവാക്കി. ഗാനത്തിനൊപ്പം മഴ നനഞ്ഞ റോഡിൽ കാറും ജീപ്പും തെന്നിപ്പോകുന്ന ദൃശ്യം തുടക്കത്തിൽ നൽകി. തൊട്ടുപിന്നാലെ ഓട്ടോറിക്ഷയും കാറുകളും ടെമ്പോയും ഇടിച്ച്‌ വരിയായി കിടക്കുന്ന ദൃശ്യവും ചേർത്തു. ഇതിനൊപ്പം ‘‘തെന്നല്ലേ, മഴക്കാലമാണ്‌ നിരത്തുകളിൽ വാഹനങ്ങൾ തെന്നി നീങ്ങാൻ സാധ്യതയേറെയാണ്‌’’, ‘‘വേഗത കുറയ്ക്കുക, -സുരക്ഷിത അകലം പാലിക്കുക’’ എന്നീ മുന്നറിയിപ്പുകളും നൽകി.
ദൃശ്യങ്ങൾക്ക്‌ അനുയോജ്യമായ ഗാനം തെരഞ്ഞെടുത്തതിനും മികച്ച മുന്നറിയിപ്പിനും അഭിനന്ദനങ്ങൾ നിറയുകയാണ്‌. പൊലീസിലെ സോഷ്യൽമീഡിയ സെൽ പ്രതിഭകൾക്ക്‌ സല്യൂട്ട്‌ നൽകുന്നവരും നിരവധി. കമൽനാഥ്‌, പി എസ്‌ സന്തോഷ്‌, ബി ടി അരുൺ, കെ സന്തോഷ്‌, സി നിധീഷ്‌, എഫ്‌ സഫ്‌ദർ എന്നിവരാണ്‌ വീഡിയോ ഒരുക്കിയത്‌. 2019ൽ സംസ്ഥാനത്ത് നടന്നതും കഴിഞ്ഞദിവസം കഴക്കൂട്ടം ബൈപാസിലുണ്ടായതുമാണ്‌ ‘തെന്നല്ലേ’ ഫെയ്‌സ്‌ബുക് പോസ്‌റ്റിലെ അപകടദൃശ്യങ്ങൾ.
