തിരുവനന്തപുരം∙ സിനിമയില്‍ അഭിനയിപ്പിക്കാമെന്ന് വാഗ്ദാനം ചെയ്ത് കരാറില്‍ ഒപ്പിട്ട ശേഷം അശ്ലീല സിനിമയിൽ നിർബന്ധിപ്പിച്ച് അഭിനയിപ്പിച്ചെന്ന കേസിൽ സംവിധായികയുടെയും സംവിധാന സഹായിയുടെയും മുന്‍കൂര്‍ ജാമ്യാപേക്ഷ കോടതി തള്ളി. തിരുവനന്തപുരം ആറാം അഡിഷനല്‍ ജില്ലാ സെഷന്‍സ് ജഡ്ജി കെ.വിഷ്ണുവാണ് ജാമ്യഹര്‍ജി തള്ളിയത്.
ഒടിടി പ്ലാറ്റ്ഫോമില്‍ ഇത്തരം കൃത്യങ്ങള്‍ നടക്കുന്നതിനെക്കുറിച്ച് ശരിയായ അന്വേഷണം നടക്കേണ്ടതിനാല്‍ പ്രതികള്‍ക്ക് ജാമ്യം നല്‍കരുതെന്ന് പ്രോസിക്യൂഷന്‍ വാദിച്ചു. പ്രതികള്‍ യുവതിയില്‍നിന്ന് ഒപ്പിട്ടു വാങ്ങിയ കരാര്‍ പത്രം കണ്ടെടുക്കാനടക്കം പ്രതികളുടെ കസ്റ്റഡി അനിവാര്യമാണെന്ന അന്വേഷണ ഉദ്യോഗസ്ഥന്‍റെ റിപ്പോര്‍ട്ടും പരിഗണിച്ചാണ് കോടതി ജാമ്യം തള്ളിയത്. നഗ്നചിത്രങ്ങള്‍ മാറ്റണമെന്ന് യുവതി ആവശ്യപ്പെട്ടിട്ടും പ്രതികള്‍ അതിനു തയാറായിരുന്നില്ല. തുടർന്നാണ് യുവതിയും മറ്റൊരു ചിത്രത്തിൽ അഭിനയിച്ച യുവാവും കോടതിയെ സമീപിച്ചത്. അഡിഷനല്‍ പബ്ലിക് പ്രോസിക്യൂട്ടര്‍ എം.സലാഹൂദ്ദീന്‍, വിനു മുരളി എന്നിവര്‍ കോടതിയില്‍ ഹാജരായി.
