കൊച്ചി ∙ ഡോ. വന്ദനാ ദാസിനെ കുത്തിക്കൊലപ്പെടുത്തിയ കേസിൽ അന്വേഷണം സിബിഐയ്ക്കു വിടണമെന്ന ആവശ്യത്തെ പ്രതിയായ സന്ദീപ് എതിർക്കുന്നതെന്തിനാണെന്നും ഇത്തരത്തിൽ എതിർക്കാൻ എന്തവകാശമാണുള്ളതെന്നും ഹൈക്കോടതി ആരാഞ്ഞു. കൊട്ടാരക്കര താലൂക്ക് ആശുപത്രിയിൽ ഹൗസ് സർജൻ ഡോ. വന്ദന ദാസ് കൊല്ലപ്പെട്ട സംഭവത്തിൽ സിബിഐ അന്വേഷണം ആവശ്യപ്പെട്ടു വന്ദന ദാസിന്റെ മാതാപിതാക്കളായ കെ.ജി.മോഹൻദാസ്, ടി.വസന്ത് കുമാരി എന്നിവർ നൽകിയ ഹർജിയിൽ കക്ഷി ചേരാൻ സന്ദീപ് നൽകിയ അപേക്ഷയിൽ ജസ്റ്റിസ് ബെച്ചു കുര്യൻ തോമസാണ് ഇക്കാര്യം വാക്കാൽ ചോദിച്ചത്. ഹർജി 23നു പരിഗണിക്കും.
