അട്ടപ്പാടി > പാലക്കാട് അട്ടപ്പാടിയിൽ വൈക്കോൽ കയറ്റിയെത്തിയ ടിപ്പർ ലോറിക്ക് തീപിടിച്ചു. ആളപായമില്ല. അട്ടപ്പാടി താവളം മുള്ളി റോഡിൽ ഇന്നലെ രാത്രി 12.30നായിരുന്നു സംഭവം. അതുവഴി സഞ്ചരിച്ചിരുന്ന റാപിഡ് റെസ്പോൺസ് ടീമാണ് ലോറിയിലുണ്ടായിരുന്നവരെ രക്ഷപെടുത്തിയത്. ആലത്തൂരിൽനിന്നു വൈക്കോൽ കയറ്റി പുതൂർ ഭാഗത്തെ സ്വകാര്യ ഫാമിലേക്കു വരികയായിരുന്നു ടിപ്പർ. കാട്ടാനയിറങ്ങിയെന്ന വാർത്തയെത്തുടർന്ന് പ്രദേശത്തേക്ക് പോവുകയായിരുന്ന ആർആർടി സംഘമാണ് ലോറിയിൽ തീപിടിക്കുന്നതു കണ്ടത്.
ഉടൻ തന്നെ ലോറിയിലുണ്ടായിരുന്ന വൈക്കോൽ റോഡിലേക്ക് തള്ളിയിട്ടു. പുതൂർ പൊലീസും കോങ്ങാട് നിന്നുള്ള അഗ്നിരക്ഷാ സേനയും സ്ഥലത്തെത്തി. മൂന്ന് മണിക്കൂർ നീണ്ട പരിശ്രമത്തിനൊടുവിലാണ് തീ അണയ്ക്കാനായത്. ഡ്രൈവറടക്കം മൂന്ന് പേരാണ് വാഹനത്തിന്റെ മുൻഭാഗത്ത് ഉണ്ടായിരുന്നത്. ആർക്കും പരിക്കുകളില്ല
