കർഷകനേതാക്കളാരും വിഷയത്തിൽ പ്രതികരിച്ചിട്ടില്ല. സമരത്തെ അതിർത്തിയിൽ തടഞ്ഞ ഹരിയാനയിലെ ബിജെപി സർക്കാരിനെതിരെ പ്രതിഷേധം ശക്തമാക്കുമെന്ന് കർഷകർ നേരത്തെ തന്നെ അറിയിച്ചിരുന്നു. ഡൽഹി അതിർത്തിയിലേക്ക്‌ മാർച്ചുചെയ്യാനാണ് തീരുമാനം. ഹരിയാനയിലെ കുരുക്ഷേത്രയിൽ ബികെയു (ചരുണി) വിഭാഗം വിളിച്ചുചേർത്ത കർഷക മഹാപഞ്ചായത്ത്‌ കേന്ദ്ര സർക്കാരിനെതിരെ പ്രമേയവും പാസാക്കി. ഖാപ്‌ പഞ്ചായത്ത്‌ പ്രതിധിധികളും പങ്കെടുത്തു. ഇതോടെ ഹരിയാന, പഞ്ചാബ്‌ സംസ്ഥാനങ്ങളിലെ വിവിധ ജില്ലകളിൽ ഇന്റർനെറ്റ്‌ നിരോധനം നീട്ടിയിരുന്നു.
പഞ്ചാബ്‌ മുൻ മുഖ്യമന്ത്രിയും ബിജെപി നേതാവുമായ ക്യാപ്‌റ്റൻ അമരീന്ദർ സിങ്, ബിജെപി സംസ്ഥാന പ്രസിഡന്റ്‌ സുനിൽ ഝക്കർ, കേവാൽ ധില്ലൻ എന്നിവരുടെ വീടുകൾക്കു മുന്നിൽ ബികെയു (ഉഗ്രഹാൻ) വിഭാഗം ഞായറാഴ്ച സമരവും തുടങ്ങി. തെരഞ്ഞെടുപ്പ് പെരുമാറ്റച്ചട്ടം വരുന്നതുവരെ ചർച്ച നീട്ടിയശേഷം കൈയൊഴിയാനുള്ള നീക്കം അനുവദിക്കില്ലെന്ന്‌ കർഷക നേതാവ് ജഗ്ജിത് സിങ് ദല്ലേവാൾ പറഞ്ഞു.
