തലശ്ശേരി: റെയിൽവേ സ്റ്റേഷൻ പരിസരം പിടിച്ചുപറിക്കാരുടെയും അനാശാസ്യക്കാരുടെയും താവളമായി. പുതിയ ബസ് സ്റ്റാൻഡ് സദാനനന്ദ പെട്രോൾ പമ്പ് പരിസരത്ത് നിന്നും റെയിൽവേ സ്റ്റേഷനിലേക്കുള്ള ഊടുവഴിയാണ് സാമൂഹിക വിരുദ്ധർ കൈയടക്കിയിട്ടുള്ളത്. ഇതുവഴിയുള്ള യാത്ര റെയിൽവേ നിരോധിച്ചിട്ടുണ്ടെങ്കിലും സ്റ്റേഷനിലേക്ക് എളുപ്പമെത്താൻ പലരും ആശ്രയിക്കുന്നത് ഈ വഴിയാണ്. മയക്കുമരുന്ന് വിൽപനക്കാരും മറ്റ് അസാന്മാർഗിക പ്രവർത്തകരും രാപ്പകൽ ഭേദമില്ലാതെ ഇവിടെ തമ്പടിക്കാറുണ്ടെന്നാണ് പരിസരവാസികൾ പറയുന്നത്. പിടിച്ചുപറിയും ഇവിടെ വ്യാപകമാണ്.
മാനഹാനിയോർത്ത് സംഭവം ആരും പുറത്തുപറയുന്നില്ലെന്ന് മാത്രം.കഴിഞ്ഞദിവസം സംഗമം മേൽപാലത്തിന് താഴെ കാർ നിർത്തി നിൽക്കുകയായിരുന്ന യുവ ഡോക്ടറും പിടിച്ചുപറിക്കിരയായി. രാത്രി എട്ട് മണിയോടെയാണ് പെരുന്താറ്റിൽ സ്വദേശിയായ ഡോക്ടർ സാമൂഹികവിരുദ്ധരുടെ പിടിച്ചുപറിക്കിരയായത്. ഇദ്ദേഹത്തിന്റെ കൈയിൽ നിന്നും മൊബൈൽ ഫോണും 800 രൂപയും രണ്ടു പേർ തട്ടിയെടുത്ത് ഇരുട്ടിൽ മറയുകയായിരുന്നു. ഡോക്ടറുടെ പരാതിയിൽ തലശ്ശേരി പൊലീസ് കേസെടുത്തു. പ്രതികളെ തിരിച്ചറിഞ്ഞതായി സൂചനയുണ്ട്.
