തിരുവനന്തപുരം∙ പുതുപ്പള്ളി ഉപതിരഞ്ഞെടുപ്പിന്റെ പേരിൽ കോട്ടയം ജില്ലയിലെ ഓണക്കിറ്റ് വിതരണം തടയരുതെന്നഭ്യർഥിച്ച് മുഖ്യ തിരഞ്ഞെടുപ്പ് ഓഫിസർക്കു പ്രതിപക്ഷ നേതാവ് വി.ഡി.സതീശൻ കത്തു നൽകി. ഉപതിരഞ്ഞെടുപ്പിന്റെ പശ്ചാത്തലത്തിൽ കോട്ടയം ജില്ലയിൽ ഓണക്കിറ്റ് വിതരണം നിർത്തിവയ്ക്കാൻ തിരഞ്ഞെടുപ്പു കമ്മിഷന്റെ നിർദേശമുണ്ടെന്ന മാധ്യമ വാർത്തകളുടെ അടിസ്ഥാനത്തിലാണു കത്ത്.
ഓണാഘോഷത്തിനു കിറ്റിനെ ആശ്രയിക്കുന്ന ആയിരക്കണക്കിനു കുടുംബങ്ങളെ ബാധിക്കുന്നതാണു തീരുമാനമെന്നും ഉപതിരഞ്ഞെടുപ്പ് നടക്കുന്നതിലെ സാങ്കേതികത്വം കിറ്റ് വിതരണത്തിന് തടസ്സമാകാൻ പാടില്ലെന്നും കത്തിൽ ചൂണ്ടിക്കാട്ടി. 60 വയസ്സിനു മുകളിലുള്ള പട്ടിക വർഗക്കാർക്ക് ഓണ സമ്മാനമായി 1000 രൂപ നൽകുന്ന പദ്ധതിയിൽ നിന്നു കോട്ടയം ജില്ലയെ ഒഴിവാക്കിയ നടപടിയും പിൻവലിക്കണമെന്ന് ആവശ്യപ്പെട്ടിട്ടുണ്ട്.
