കുറ്റ്യാടി : ∙ കാണാതായ കോളജ് വിദ്യാർഥിനിയെ അടച്ചിട്ട വീട്ടിൽ വിവസ്ത്രയാക്കി കെട്ടിയിട്ട നിലയിൽ കണ്ടെത്തി. കോഴിക്കോട് നിന്നും ബുധനാഴ്ച രാവിലെ മുതൽ കാണാതായ പെൺകുട്ടിയെയാണ് കുണ്ടുതോട് ഉണ്ണിത്താൻകണ്ടി ജുനൈദിന്റെ വീട്ടിൽ നിന്ന് കണ്ടെത്തിയത്. ഇയാളുടെ മാതാപിതാക്കൾ വിദേശത്താണ്. ഈ വീട്ടിൽ നിന്ന് എംഡിഎംഎയും കണ്ടെത്തിയിട്ടുണ്ട്. ജൂനൈദ് ഒളിവിലാണ്.
പെൺകുട്ടിയെ കാണാനില്ല എന്ന പരാതിയെ തുടർന്നാണ് പൊലീസ് അന്വേഷണം തുടങ്ങിയത്. മൊബൈൽ ഫോൺ ടവർ ലൊക്കേഷൻ കേന്ദ്രീകരിച്ച് നടത്തിയ അന്വേഷണത്തിലാണ് ഈ വീട്ടിലുണ്ടെന്ന് കണ്ടെത്തിയത്. പൊലീസും നാട്ടുകാരും വീടിന്റെ വാതിൽ പൊളിച്ചാണ് അകത്തു കയറിയത്.
ഒളിവിൽ പോയ ജുനൈദിനായി തിരച്ചിൽ ആരംഭിച്ചതായും ഉടൻ പിടിയിലാകുമെന്നും പൊലീസ് പറഞ്ഞു. നാദാപുരം ഡിവൈഎസ്പി വി.വി.ലതീഷിന്റെ നേതൃത്വത്തിലാണ് അന്വേഷണം. പെൺകുട്ടിയിൽ നിന്ന് പൊലീസ് വിശദമായ മൊഴിയെടുക്കും.
