കൊച്ചു കുട്ടികളെ ഒരുക്കുമ്പോൾ വിട്ടുപോകാതെ അമ്മമാർ ചെയ്തിരുന്ന ഒരു കാര്യമാണ് കൺമഷി പുരട്ടുന്നത്. നവജാതശിശുക്കളിൽ കൺമഷി പുരട്ടുന്നത് എല്ലാ വീട്ടിലും കണ്ടുവരുന്ന ഒന്നായിരുന്നു. പണ്ട് സാധാരണ രീതി ആയിരുന്നു എങ്കിൽ ഇന്ന് നമ്മൾ അതിനെ പേടിക്കണം. കാരണം ആരോഗ്യത്തിന് ഗുരുതരമായ ഭീഷണി ഉയർത്തുന്ന ഒന്നായി അത് മാറിക്കഴിഞ്ഞു.
കൺമഷി പുരട്ടിയതിന് ശേഷം കുട്ടികളുടെ കണ്ണുകളിൽ ചൊറിച്ചിൽ, വീക്കം, അണുബാധ എന്നിവ അനുഭവപ്പെട്ട നിരവധി കേസുകൾ ആണ് പുറത്തുവരുന്നത്. ആവർത്തിച്ചു വരുന്ന ഈ കേസുകൾ മാതാപിതാക്കളെയും ഡോക്ടർമാരെയും ആശങ്കപ്പെടുത്തുകയും കുട്ടികളുടെ കണ്ണുകളെക്കുറിച്ച് ജാഗ്രത പാലിക്കാൻ ഉപദേശിക്കുകയും ചെയ്യുന്നു.
ഇന്ന് കടകളിൽ കിട്ടുന്ന പകുതി കണ്മഷികളും ശുദ്ധമല്ല. ഇതിൽ രാസവസ്തുക്കൾ, കാർബൺ, ലെഡ്, മറ്റ് വിഷ ഘടകങ്ങൾ എന്നിവ കാണാം. ഇത് കുട്ടികളുടെ അതിലോലമായ കണ്ണുകൾക്ക് ദോഷമാണ്. നവജാതശിശുക്കളുടെയും കൊച്ചുകുട്ടികളുടെയും കണ്ണുകൾക്ക് ചുറ്റുമുള്ള ചർമ്മം വലിയ ആളുകളേക്കാൾ സെൻസിറ്റീവ് ആണ്. അതുകൊണ്ടു തന്നെ അളവ് കുറവാണെങ്കിലും രാസവസ്തുക്കൾ കണ്ണുകളിൽ പ്രവേശിക്കുന്നത് പോലും ഗുരുതരമായ നാശത്തിന് കാരണമാകും.
ഇത്തരത്തിലുള്ള കണ്മഷികൾ കുട്ടികളുടെ കണ്ണിൽ വെള്ളംവരൽ, ചുവപ്പ്, ചൊറിച്ചിൽ, വീക്കം, തിരുമ്മാൻ തോന്നുക എന്നിവയ്ക്ക് കാരണമാകുമെന്ന് ഡോക്ടർമാർ പറയുന്നു. മിക്ക കേസുകളിലും അണുബാധ ഗുരുതരമാകുന്നതിനാൽ കുട്ടികൾക്ക് മരുന്നുകളും തുള്ളിമരുന്നുകളും ആവശ്യമാണ്. ഈ കൺമഷി ദീർഘനേരം ഉപയോഗിക്കുന്നത് കോർണിയയ്ക്ക് കേടുപാടുകൾ വരുത്തുകയും കുട്ടിയുടെ കാഴ്ചശക്തിയെ തകരാറിലാക്കുകയും ചെയ്യും. ഇക്കാരണത്താൽ, കുട്ടികളുടെ കണ്ണുകളിൽ ഏതെങ്കിലും തരത്തിലുള്ള കൺമഷി പുരട്ടരുതെന്ന് ഡോക്ടർമാർ നിർദ്ദേശിക്കുന്നു.
ഒരു വയസ്സിന് താഴെയുള്ള കുട്ടികളുടെ കണ്ണുകളിൽ കൺമഷി ഒരിക്കലും പുരട്ടരുതെന്ന് ആണ് ഡോക്ടർമാർ മുന്നറിയിപ്പ് നൽകുന്നത്. എന്തെങ്കിലും കാരണത്താൽ മാതാപിതാക്കൾ അത് ആവശ്യമാണെന്ന് കരുതിയാലും, കടകളിൽ നിന്ന് വാങ്ങുന്ന കണ്മഷികൾ പൂർണ്ണമായും ഒഴിവാക്കണം. അലർജി, ബാക്ടീരിയ അണുബാധ, കണ്ണിലെ ഞരമ്പുകളുടെ വീക്കം, കണ്ണുകളിൽ നിന്ന് തുടർച്ചയായി വെള്ളം വരൽ തുടങ്ങിയ പ്രശ്നങ്ങൾക്കും കൺമഷി കാരണമാകും.
