തിരുവനന്തപുരം ∙ റേഷൻ വിതരണത്തിനുള്ള ഇ പോസ് സംവിധാനം തകരാറിലാകുന്ന സാഹചര്യത്തിൽ, സംസ്ഥാനത്ത് മഞ്ഞ, പിങ്ക് റേഷൻ കാർഡ് ഉടമകളുടെ ഇ കെവൈസി മസ്റ്ററിങ് തൽക്കാലം നിർത്തിവച്ചു. അതിനാൽ റേഷൻ കടകളുടെ സമയക്രമീകരണം അവസാനിപ്പിച്ചു.
വ്യാഴാഴ്ച മുതൽ സംസ്ഥാനത്തെ മുഴുവൻ റേഷൻ കടകളും പഴയ രീതിയിൽ രാവിലെയും വൈകിട്ടുമായി പ്രവർത്തിക്കുമെന്ന് മന്ത്രി ജി.ആർ.അനിൽ അറിയിച്ചു. 7 ജില്ലകളിൽ വീതം രാവിലെയും വൈകിട്ടുമായി റേഷൻ കടകൾ പ്രവർത്തിക്കുന്ന രീതിയിൽ ചൊവ്വാഴ്ച മുതലാണു സമയക്രമീകരണം ഏർപ്പെടുത്തിയത്. ഈയാഴ്ച മുഴുവൻ ഈ സമയക്രമീകരണം തുടരാനായിരുന്നു മുൻ തീരുമാനം.
