വടകര: ബസ് യാത്രക്കാരിയുടെ സ്വർണമാല കവർന്ന നാടോടി സ്ത്രീ പിടിയിൽ. തമിഴ്‌നാട് ഡിണ്ടികൽ പാറപ്പെട്ടി കാവ്യയെയാണ് (24) ബസ് യാത്രക്കാർ പിടികൂടി വടകര പൊലീസിന് കൈമാറിയത്. വ്യാഴാഴ്ച രാവിലെ 10.45ഓടെ വടകരയിൽനിന്നും കോട്ടപ്പള്ളി വഴി ആയഞ്ചേരിയിലേക്ക് പോവുകയായിരുന്ന ശ്രേയസ് ബസിലാണ് സംഭവം. ആയഞ്ചേരി വള്യാട് സ്വദേശിനി വണ്ണാത്തി പറമ്പത്ത് ബാലന്റെ ഭാര്യ സുധയുടെ 14 ഗ്രാം സ്വർണമാലയാണ് കവർന്നത്. വടകര ജില്ല ആശുപത്രിക്ക് മുൻവശം എത്തിയപ്പോഴായിരുന്നു മോഷണം. പ്രതിയെ പൊലീസ് അറസ്റ്റ് ചെയ്തു.
