ജയ്‌പുർ : രാജസ്ഥാനിലെ മത്സര പരീക്ഷാ പരിശീലനകേന്ദ്രമായ കോട്ടയില്‍ നിന്ന് കാണാതായ വിദ്യാര്‍ഥിയുടെ മൃതദേഹം കണ്ടെത്തി. മധ്യപ്രദേശ് സ്വദേശി രചിത് സൊന്ധ്യയുടെ മൃതദേഹമാണ് കണ്ടെത്തിയത്. ജവഹര്‍ നഗറിലെ ഹോസ്റ്റലില്‍ താമസിച്ചിരുന്ന രചിതിനെ കഴിഞ്ഞ ഞായറാഴ്ചയാണ് കാണാതായത്. ഗരാഡിയ മഹാദേവ് ക്ഷേത്രത്തിനു സമീപമുള്ള വനമേഖലയിലേക്ക് രചിത് പ്രവേശിക്കുന്നത് സുരക്ഷാ ക്യാമറയിൽ പതിഞ്ഞിരുന്നു.
പരീക്ഷയ്ക്ക് മുമ്പാണ് യുവാവ് ഹോസ്റ്റൽ വിട്ടത്. ദുരന്തനിവാരണ സേനയും പൊലീസും നടത്തിയ അന്വേഷണത്തിലാണ് ചമ്പൽ താഴ്‌വരയിൽനിന്നും മൃതദേഹം കണ്ടെത്തിയത്. ഡ്രോൺ ഉൾപ്പെടെ ഉപയോഗിച്ചായിരുന്നു തിരച്ചിൽ. കുന്നിൽനിന്ന് താഴ്‌വരയിലേക്ക് ചാടിയതാകാമെന്നാണ് പൊലീസ് സംശയിക്കുന്നത്.
