താമരശ്ശേരി: ചുരത്തിൽ മരം മുറിഞ്ഞ് വീണും ലോറി കേടായും ഇന്നലെ വൈകിട്ട് യാത്രക്കാർ ദുരിതത്തിലായി. വൈകിട്ട് നാലോടെ 8–ാം വളവിനടുത്താണ് മരം മുറിഞ്ഞ് വീണ് ഗതാഗതം ഭാഗികമായി തടസ്സപ്പെട്ടത്. കൽപറ്റയിൽ നിന്ന് എത്തിയ അഗ്നിരക്ഷാ സേനയും വനം വകുപ്പ് ഉദ്യോഗസ്ഥരും ചുരം സംരക്ഷണ സമിതി പ്രവർത്തകരും ചേർന്ന് മരം മുറിച്ച് മാറ്റി തടസ്സം നീക്കം ചെയ്യുമ്പോഴേക്കും 7–ാം വളവിന് മുകളിൽ കർണാടകയിൽ നിന്ന് അടൂരിലേക്ക് കല്ലുമായി വന്ന ലോറി കേടായി ഗതാഗതം വീണ്ടും ഭാഗികമായി തടസ്സപ്പെട്ടു. രാത്രി ഏറെ വൈകിയും വാഹനങ്ങൾ വൺവേ ആയാണ് കടന്നു പോകുന്നത്. ഇതുമൂലം ചുരം റോഡിന് ഇരു വശത്തും വാഹനങ്ങളുടെ നീണ്ട നിരയായിരുന്നു.
